Transcription
O esperitz des femmes Heroides
Qui demourez près des undes humides
Du fleuve Stix, vueillez à moy entendre.
Ne nourrissez plus d’espoir vostre cendre,
Voicy le jour, voicy l’heure venue,
Où vous aurez response bien congneue
De voz escriptz, non en latin, ainçoys
Vous la lirez en langaige Françoys :
Car ung d’Amboyse, ayant de vous pitié,
Pour satisfaire à si grande amytié,
N’a point voulu si long temps estre vains
Voz espoirs, ny les labeurs de voz mains.
Ne me vantez vostre Poete Ovide
S’il a pour vous bien escript : car je cuyde
Que s’il en a louenge, que d’Amboyse
Ne l’aura moindre en sa langue Françoise,
Et comme fut Ovide le bruyt, voire
Le seul honneur de Salmo, et la gloire,
Ainsi sera d’Amboyse la vantance
De Chevillon, en la langue de France.
