Mère de Dieu qui fustes mise
Et assise
Là sus au throsne divin
En ceste présente église
Sans faintise
Suis venu à ce matin
Comme vostre pèlerin,
Chef enclin,
Et de bon cueur vous présente
Mon corps et mon âme, affin
Qu'à ma fin
Vous vueillez estre présente.

Glorieuse et débonnaire,
Exemplaire
De parfaicte charité,
Vers vous ie me viens retraire,
Car soustraire
Vueil mon cueur de vanité.
Hellas ! dame, j'ay esté
Maint esté
Et maint yver sans bien faire,
L'ennemy m'a enhorté
Et tenté
Pour moy en enfer attraire.

Très souveraine princesse,
Je confesse
Que depuis ma congnoissance
J'ay suivi folle jeunesse
Par simplesse,
Et toute vaine plaisance,
Bien doy en vraye espérance,
Sans doubtance,
Requérir vostre confort
Et que j'aye en habondance
Repentance
Devant que ie soye mort.

Ie suis des mauvais le pire,
A bref dire,
Car tout mon entendement
A péché et à mal tyre,
Et s'empire
De iour en iour grandement
Quand ie y pense femement,
Vrayement
Je ne scay plus que ie face
Sinon de plourer forment
Humblement
Devant vostre doulce face.

D'orgueil ne me excuse mie,
Ne d'envye,
D'avarice et de luxure
Non fay ie de gloutonnye,
Dont souillie
Ay mon âme oultre mesure ;
Par ire ay dict mainte iniure
Laide et dure,
Par paresse et négligence
Ay mys m'âme en aventure.
Vierge pure
Si vous n'y mectez deffence.

Raconter ie ne sauroye,
Ne pourroye,
Mes péchez dont j'ay grant faiz,
Et se tout dire povoye
Ou vouloye
Je n'auroye faict huy, mais
Certes non espoir iamais
Si mentais,
Et vous supplie, vierge et mère,
Que vueillez faire ma paix
Des meffaictz
Que j'ay faictz vers Dieu mon père.

Souveraine et haulte dame,
Sans nul blasme,
A vous doibt on recourir
Pour sauver le corps et l'âme
De la flame
Que nous devons tous cremir.
Chascun doit avoir désir
De venir
Vers vous gratieuse et belle,
Car tout bien et tout plaisir
Peult sentir
Le vray cueur qui vous appelle.

Très précieuse fontaine,
Chère et saine,
Et vraye estoille de mer,
Espérance très certaine
D'amour plaine,
Pour pécheurs réconforter,
Où me pourray je bouter
Moy sauver,
Quant Dieu iuger nous viendra ?
Qui me pourra conforter
Ne garder,
Vierge, quant ce jour viendra ?

Hélas ! Vierge, que feront,
Que diront
Pécheurs à celle iournée ?
Car les anges trembleront
Quand orrunt,
La sentence redoubtée.
Lors soyez, Vierge honorée,
Esplourée,
Devant Dieu à ioinctes mains
En disant doulce portée
Très aymée,
Ayez mercy des humains.

Lors ny vauldra lamenter
Ne plorer,
Hélas ! se sera trop tart ;
Là me verray accuser,
D'excuser
Il n'y aura nul regard,
L'ennemy querra sa part
Par son art
Et vouldra m'âme emporter
En enfer qui tousiours art
Sans départ.
Dieu ! quelle angoisse à porter !

Hélas donc ! et que feray ?
Où yray
A ce iour horrible et fier ?
A vous, dame, me rendray
Et diray
Que suis vostre prisonnier.
A vous me vueil ralier
Et fier,
Car vous estes si bénigne
Que ne pourriez omblier
Ne laisser
Celuy qui vers vous s'encline.

Pour ce, Virge au cueur piteux,
Moy paoureux
Comme tout desconforté,
Dolent, pensif, pou ioyeux,
Angoisseux,
A vous me suis présenté
Affin que me regardez
Et gardez
A ce iour espoventable ;
Mon âme es sainctz cieulx mectez
Et sauvez
En la gloire pardirable.

Amen