Text
Saint Christofle, martir très doulz,
Prie le roy des roys pour nous,
Affin que nous puissiens venir
Ou règne qui ne puet fenir.
Dieu tout puissant, roy permanable,
Qui en ta gloire pardurable,
Feiz venir par grant martyre
Saint Christofle, ie te prie, sire,
Si voir, comme l'Escripture
Tesmoingne, qui d'entente pure
L'ymage saint Christofle regarde
Dévotement, que il n'a garde
D'entrer en langour la iournée
Et grâce li en fut donnée
Pour voir le iour qu'il receut mort,
Car qui à luy servir s'amort,
Il le garde de mort soubite
Et de renommée despite,
Et quiconques si le requiert.
De bon cuer, il a ce qu'il quiert.
Jhésu, par les saintes mérites
Du saint qui ne sont pas petites.
Que roy des martirs le nommas,
Et pour luy grans vertus monstras,
Garde moy d'ennuy et de hontaige,
D'encombrier, de faulx tesmoignage,
Moy et trestous mes amis
Qui souvent se sont entremis
De moy aidier et conforter.
Ainsi devons-nous saluer
Saint Christofle et sa figure
Pour nous oster de toute ordure.
Dieu qui pour nous fu en croiz mis,
Chaciez en loing nos annemis,
Touz visibles et invisibles
Et trestoutes choses nuisibles.
A Dieu recommant et à vous
M'âme, mon corps et mes biens tous.
Deffendez moy, amis de Dieu
Icy et en tout aultre lieu,
Et aux âmes de mes amis,
Vueilliez empêtrer paradis.
Amen
Witness (note)
Paris, Bibl. nat., lat. 13291, fol. 206-207 v°, XVIes. Heures de » Châlons.Paris, Bibl. nàt., nouv, acq. lat. 703, fol. 48 y°, XVes.Paris, Bibl. de l’Ecole des Beaux-Arts, 478, fol. 140-140V0, XVes.Provins, Bibl. mun., 21, dernier feuillet du ms., XVes. (addition).Saint-Omer, Bibl. mun., 68, fol. 7, XIVes.Soissons, Bibl. mun., iio, fol. 3v°-4, XVes.Sens, Bibl. mun., 39, XVes.Grenoble, Bibl. mun., 1007 (cat. 166), fol. 144-145 v°, XVIes.Helsinki, Livre d’heures de la baronne E. Hisinger, fol. 130 v°, XVes.La Haye, Bibl. roy., 78. J. 49, fol. 378, XVes. Heures.Paris, Bibl. hat., fr. 984, fol. 14 v°-15 v°, XVIes.Paris, Bibl. nat., fr. 19186, fol. 144-144 v°, XVes.Paris, Bibl. nat., fr. 24865, fol. 69 v° et fol. 199, XVes.Paris, Bibl. nat., lat. 924, fol. 310-312, fin du XIVes. Heures de Troyes.