Ihésus, doulx Dieu, filz de Marie,
Qui, par ta mort, de mort à vie
As rachaté humain linage,
M'âme à toy conioins et lie
Si par ta mort qu'après ma vie
De paradis aye l'éritage.

Jhésus qui fist et terre et mer,
Nul ne te peut du ceur clamer
Qui de toy n'ait confort et ioye,
Sire n'en te doyt bien amer
Car en t'amour n'a point d'amer
Si te prie que ta mie soye.

Ihésus, m'âme conduis et maine,
Et me garde de mort soudaine
De péchié, de temptacion,
Que l'anemy ne me souprenne
En nulle vanité mondaine
N'ait en moy dominacion.

Ihésus, ie suis ta créature
M'âme et mon corps met en ta cure
Tu en peus fere à ton non loir,
Doulx Dieu, ne me fay pas dreture
Selon mes péchiés
plains d'ordure
Vueilles de moy merci avoir.

Ihésus, en qui tout bien habunde,
L'anemy, la chair et le monde,
Et le deffault de vroye foy
Moy procurant la mort seconde
Orgueil tout mal en moy sourmonte
Très doulx Ihésus, défen moy.

Ihésus, ton incarnacion,
Ton amoureuse passion
Qui tant est doulce à recorder,
Me doint saincte réfection,
Pardurable rédampcion
Toy bien amer sans descorder.

Ihésus, par ta pitié, conforte
M'âme qui trop se desconforte,
Et se doyt bien desconforter
Car elle se sent périe et morte
Des très grans péchiez qu'elle porte,
Plese toy la réconforter.

Ihésus, donne moy cognoissance
De mes péchiez et repentance,
A la mort vraye confession,
Donne moy fere penitence
Que eschaper puisse la sentence
Où n'a nulle rédempcion.

Ihésus qui voult en la croiz pendre
Pour nous de l'anemy deffendre,
Vueillez mon cuer enluminer,
Tes piés, tes bras, ton corps estendre
Et ton précieux sangc espandre,
Donne moy ioye sans finer.

Ihésus, ta croiz, tes cloux, ta lance.
Tes courges, ta dure pénitance,
Ta couronne poignant et dure,
Ton sangc et ta mort d'abundance
Me soyt à la mort délivrance
De la paine qui touz iours dure.

Amen. Amen. Vray Ihésus,
Vierge net et pur, précieux
Corps Ihésucrist, saint sacrement,
Notable Ihésucrist parfectement
Merci ie vous requier.
Pater Noster. Ave Maria

Loches, Bibl. mun., 17, non folioté, XV^es.