Peché trouble ma conscience
En pleurs et paour, passe mes nuicts
Sans dormir, en bonne esperance,
Je seuffre travaux et ennuys.
Mon repos, de perilleux songe
Me persecute à tous propos,
Dont mon esprit tormente et ronge
Sans luy permettre aucun repos.
Deffends, ô seigneur trespropice,
De tant pestifere accident,
Qui de la mort est un indice
Et signe trop plus qu’evident.
J’ay mes jours en amaritude
Passez, consumé je me suys,
Soucy, douleur et leur estude
M'ont rendu tel que plus n’en puis.
Lassé de mon corps et sa charge,
Courbe, et bossu, allois marchant.
En vain, pour en avoir descharge,
La Terre et tumbeau suis cerchant.
Hors et dedans, travaux me pressent,
Mes domestiques ennemys,
Trouvez par tout, tant fort m’oppressent
Que jusqu’à la mort m’ont submis.
Et moy (es cruelles funebres,
Ensevely et endormy)
Suis tumbé es noires tenebres,
Opprimé et mort à demy.
Tu es de salut asseurance,
D’autre n’espere aucun confort,
En toy mise est ma confiance,
En en ton bras celeste et fort.
Vien tost, preste moy et acorde
Secours en ma necessité,
Par ta saincte misericorde,
Preserve moy d’aversité.
