Transcription
Ton portrait, que j’ydolatre,
Ne me respond que des yeulx :
Mais il me rend si folastre
Esperant recevoir mieux,
Qu’avec ceste ymage morte
A soufrir je me faiz forte.
Si est-ce que ceste face
Ne me ravit tellement
Qu’en mon esprit je ne face
Un meilleur contentement,
Quant à mes yeux je descœuvre
De ta plume le chef d’œuvre.
Ta plume qui poëtise
En vers gracieux et doux,
Sans cesse en mon cœur atise
Le feu commun entre nous,
Le feu vif qui me fait vivre
Pour tes heureux pas ensuivre.
Mais quoy ? ceste art poëtique
Tu me sembles desdaigner,
Pource qu’à la prosaïque
Tu veux tousjours te baigner :
N’est-ce assez escrit en prose ?
En vers faut faire autre chose.
Vray est que ces variables
Leçons, de ta grand’ forest,
Nous sont bien tant profitables
Que nous y ferons arrest,
Tirant de ce vert bocage
Fruit commode pour tout aage.
Source
Exemplaire non numérisé de : Les diverses leçons de Pierre Messie, Paris, Groulleau et alii, 1552 (Paris, Arsenal).
