Heur de labeur selon la peine mise,
Si le labeur est de chose permise,
Vient à la fin en saison et temps veu,
Au laboureur qui a son cueur tendu
A travailler pour la chose requise.
Ainsi aurons nostre esperance acquise
Du hault seigneur, d’avoir sa gloire exquise
Apres avoir longuement attendu
Heur de labeur.
Puis que labeur pour la gloire promise,
Attend bon heur : à labourer je vise :
Car je scay bien qu’au siecle pretendu,
Heur, me sera de mon labeur rendu,
C’est tout l’espoir, de ma seule divise,
Heur de labeur
