Sainte-Marthe Charles de, "Raison contraint ma plume de voler"
Transcription: id 47836
LINKED MEDIA
Incipit
Raison contraint ma plume de voler
Titre
A noble Loys de sainct Martin, d’Arles , luy estant malade
Transcription
Raison contraint ma plume de voler,
Où doubte avoit premierement aler,
Jusques vers vous, toute craincte faillie.
Et m’est advis quand feroit aultrement,
Qu’elle fauldroit contre vous grandement.
Car je ne saiche excuse estre si haulte,
Que peust souffire à couvrir telle faulte,
Mais si ne peut grandement proffitter,
A tout le moins sera pour m’acquitter,
Et demonstrer une grand’ promptitude
D’un Cueur entier, fuyant Ingratitude,
Ainsi que fait un loyal Debiteur.
Tenu au sien Liberal Crediteur.
A vous je suis debiteur, d’une debte
De tant hault pris, que si c’estoit recepte
D’or ou d’argent, voire et encores plus.
Je le confesse, or il reste au surplus
De prendre peine au long vous satisfaire.
A scavoir mon si je le pourray faire ?
Aulmoins, ainsi comme j’y suis tenu ?
Vous avez sceu ce, qui m’est survenu.
Et par pitié de mon grand infortune,
Ma passion vous a esté commune,
Et oultre plus, vous aviez proposé
Me venir veoir, mais vous n’avez osé,
Comment osé ? de paour que l’entreprise,
Que vous faisiez, fust de par moy reprise ?
En quoy celà ? car (ainsi qu’avez dit)
Vous n’aviez pas envers moy le credit,
J’entends credit, privée cognoissance.
Mauldicte soit icelle deffiance,
Qui en causant la faulte de loisir,
Ainsi privé m’a de ce grand plaisir.
Mais si faisons (Monsieur ) ensemble compte,
Lequel des deux eust senty plus grand honte,
Ou vous, venant par vostre humanité
Me visiter en mon adversité,
Ou moy paouvret, me veoyant en destresse
Et consolé par vostre grand noblesse ?
Il est certain, que bien plus asseuré
Est l’honnorant, que n’est l’Homme honnoré.
De l’honneur donc que proposiez me faire,
Je ne doibs pas ainsi (Monsieur ) me taire.
Non que le puisse en rien recompenser,
Mais (pour le moins) si me fault il penser,
Le bon vouloir y estre tant perfaict,
Comme s’il fust venu à son effect.
Et vous en rends humblement grand mercy,
Priant JESUS, que je ne sois icy
De tels bienfaicts jamais mescognoissant.
Au demeurant suis vostre obeissant,
En tous endroits, et tous tempz, sans ployer,
Où vous plaira (Monseigneur ) m’employer.
Copiste
Claire Sicard
