Qui d’un Poëte entend suivre la trace
En traduisant, et proprement rimer,
Ainsi qu’il faut la diction limer,
Et du François garder la bonne grace,
Par un moyen luy conviendra qu’il face
Egale au vif la peinture estimer,
L’art en tous pointz la Nature exprimer,
Et d’un corps naistre un corps de mesme face :
Mais par sus tous met son honneur en gage,
Et de grand’ peine emporte peu d’estime,
Qui fait parler Petrarque autre langage,
Le translatant en vers rime pour rime :
Que ne pleust aux Dieux et Muses consentir
Qu’il en vinst un qui me peust desmentir.
