Text
Glorieuse virge reigne, En qui, par la vertu divine, Ihésucrist print humanité, Tu qui es fontaine et racine, De touz biens mon cuer enlumine, Doulce damme, par charité. Damme de paiz et de concorde, De pitié et de miséricorde, De doulceur et de bonne vie, A Ihesucrist ton Filz accorde M'âme qui tant est ville et orde Que i'ay par mon péchie honie. Pucelle necte, fine et pure, En toy doit l'en mettre sa cure, Toy doit l'en servir et amer, En toy print Ihésu Crist figure, Damme, sans nulle bleceure Et sans nulle paine endurer. Glorieuse virge Marie, Plaine de confort et d'aye, Toy doit l'en servir et amer, Moult vault ton povair et t'aie, Car tu as partout seignourie En ciel, en terre et en mer. Damme de pitié bouteillière, Damme de pardon trésorière, Damme plaine d'umilité, Fay à cellui pour moy prière Que tu portas saine et entière Et sans perdre virginité. Tu es de tous biens la fontaine, Tu es de toute bonté plaine, Tu es celle en qui se forma Et celle en qui print char humaine Sans doulour avoir et sans paine, Cellui qui nous fist et forma. Tu es la flour, tu es la rose, Tu es celle en qui se repose La doulcour qui toute autre passe, Tu es celle en qui est enclose La beauté qui pour nulle chose Oui soit ne fausse ne ne casse. Tu es celle qui nous soustient, Et celle de qui tout bien vient, Et celle qui toute bonté Et toute valeur contient, Tout autre los au-dessoubz vient Là où le tien est raconté. Tu es celle en qui deigna prendre, Pour nous garantir et deffendre, Humanité, le Sauvours, Qui sa précieuse char tendre Souffrit à lapider et pendre En la croiz pour nous pécheours. Virge pucelle, précieuse, Virge pleisante et déliteuse, Virge qui le Filz Dieu portas Oy moi de t'oreille piteuse, Très douce damme gracieuse, Qui Théophille confortas Deffans moi d'orgueil, d'ire et d'envie, De avarice et de glotonnie, De conveitice et de luxure, Si que ie puisse par t'aie Eschapper la grant pulantie Qui est en enfer et l'ordure. Doulce dame de noble atour, Qui portas nostre créatour, A toi me rens, à toi m'enfuy, Tu es noustre procuratour, Tu es le chasteau et la tour Où nous alons touz à refuy. Enseigne moi si maintenir En cest monde et contenir, Que ie puisse à la compeignie Et à la grant ioie venir Qui touz iours dure sans fenir Après ceste présente vie. Virge, doune moi remembrance De mes péchiez et repentance, Et voulonté de confesser, Tant com ie suy en ceste estance, Et d'en faire la pénitance Tant quant ie vivrai sans cesser. Damme de la ioie célestre, Nulz qui te serve ne puet estre Dampné, ne qui te porte honneur ; Tu es celle de qui voulit nestre Noustre créatour, noustre mestre Noustre père, noustre seigneur. Damme tu es des cielx la porte, Et celle qui pardon aporte A ceulx qui ont à Dieu méffait ; Par ta sainte pitié conforte M'amme qui est périe et morte Par les grans péchiez que iay fait. Damme qui fus mère et norrice Et garde du roy de iustice, Par ta sainte pitié conseille Mon esperit plain de malice, Plain de péchié et plain de vice, Oui à nul bien ne s'apareille. Damme en qui est trouvé et pris Tout conseil, tout los et tout pris, Tout sen et toute courtoisie, Ceste âme qui tant a mespris Et que péchié tient et a pris, Conseille, conforte et chastie. Damme plus que nulle autre amée En paradis et honnourée, Oui enfantas Noustre Seigneur, Par toi nous est ioye donnée, Doulce damme bieneurée, Confort et soulaz et amour. Damme plus que nulle autre belle, Qui le filz Dieu, virge pucelle, Enfantas sans doulour avoir, Dont l'ange t'aporta la novelle, A ceste amme qui cy t'apelle Fay pardon et merciz avoir. Dame en qui est toute plante De bien, doune moi volonté De bien faire et dévocion, Et me tray hors de l'orfante De péchié qui tant m'a tempté Et tenu en subiection. Damme qui onc ne fus avère De pardon, en toi veult eslère Le Filz Dieu son incarnacion Pour nous mettre hors de misère Et de la pulantie amère Pardurable où nous estion. Je suy de tout mal entechié En moi est tout bien asséchié Aumosne, oroison, pénitance, Damme ie scey bien que ie chié Jusques en enfer par mon péchié Si ie n'ay de vous secourance. Ie me suy tous iours délité, En toute mauvestie suyllé, Ma conscience me remort, Marie, plainne de pitié Moustre moy signe d'amitié Ou scey bien que ie suy mort. Marie, tu portas le fruit Par quoi fut brisé et destruit Enfer où nous estions mis, Par toy avons ioie et déduyt Et confort et seurconduyt Nous à Ihésu par toy promis. Marie, tu as sourmonté Toutes les chouses qui ont esté Et qui ores sont et seront, Le grant confort et la bonté Ne pourroit estre raconté Que ceulx auront qui t'ameront. Marie, ie te vueil prier Que tu me vueilles aider Contre l'ennemy et deffendre Qui ne me fine d'espier Nuyt et iour de contrairier Comment il me puisse somprandre. Doulce dame qui es refuy Aus péchours, à toy a fuy Que tu me soies secourable, Enseigne moy voie et conduy, Que ie aie l'amour d'icelluy Qui doune vie pardurable. Virge plaine d'umilité, En qui toute la Trinité Se herbergea perfectement, Moy qui ay toute iniquité, Mect en voie de vérité, Qui tant ai mespris malement. L'ennemi d'une part me chace, Et de l'autre part me menace La mort qui est près de moi cy, Dieu ! or ne scey ie que ie face Si Marie ne me pourchace Vers Ihésucrist son Filz merci. Dieu ! or ne scey ie que ie face, Que onc ne fu en celle place, Que ie feisse bien en cest monde Je doubte que ennemis m'embrace Si ma paiz vers Dieu ne pourchace Marie en qui tout bien habunde Doulce dame, courtoise et sage, A qui nulle ne s'aparage Si ie ne suys resuscité Par toi, ie suys de héritage De paradis, par mon oultrage, A touz iours mes déshérité. A toi me rens, à toi me livre, Dame qui de touz maulx es mire, Très doulce damme, ie ne scey Comment ie puisse estre délivré, Si tu ne m'effaces du livre De perdicion où ie suy. Dame, de paradis avoie M'âme qui cy forment s'esmoie Pour ses péchiez et desconforte, Et la conduy et met en voie, Que Ihésucrist ton fils la voie O ses yeulx de miséricorde. Pucelle plaine de purté, Si ie n'ay pour toy seurté, En grant péril suy malement, Chace de mon cuer l'occurté De péchié qui tant m'a hurté Et tenu et prins longuement. Glorieuse virge Marie, Nul ne te sert, nul ne te prie Nul ne te veult merci crier A qui tu ne faces aie Ou à la mort ou à la vie, En toy se doit l'en bien fier. Pucelle fine, pure et necte, En qui nulle ordure n'areste, Pran m'âme qui languist en cure, Et prie ton Filz qu'il la mecte Quand elle partira de ceste Vie en celle qui touz iours dure. Virge pucelle, virge fine, Virge en qui tout le monde s'encline, Qui tous péchiez puez estaindre, Arrage de mon cuer l'espine De péchié qui cy ne me fine De contrairier et de poindre. Reigne de miséricorde, D'entour mon coul oste la corde De péchié dont suys encordé, Et la dépièce et la descorde, Et me repaise et accorde A Dieu où suys désaccordé. Virge de touz biens aournée Oncquez ne fut de mère née Ne iamès ne sera ton per, Enseigne-moi, virge honnourée Comment ie puisse la fumée Et le feu d'enfer eschever. Par toi fut pais en terre mise, En toi fut humanité prinse En la saincte incarnacion, Par toy nous est ioie promise Et vie pardurable acquise Et toute consolacion. Estoille de mer fine et clère, En toy fut prinse la matière Pour quoy la mort d'enfer périlt, De toy fist Ihésucrist sa mère, En toy se herberga le Père, Et le Filz et le Saint-Esprit. Parchemin ny aincte ne cyre Ne pourroit dire ne souphire A qui bien vouldroit ta bonté Ton sens et ta loenge dire, Et seusent tous ceulx escripre Qui sont, furent et seront né. Prie celuy, benoite Mère, Qui nous mist hors de la misère Pardurable où nous estion, Par le péchié du premier père, Qu'il me doint, ains que ie muyre, De mes pechiés rémission. Dame en qui toute bonté maint, Qui has par ta proière maint Conforté et sauvé jadis, Prie à celuy que il nous maint A bonne fin et qu'il nous doint La grant ioye de paradis. Ad ioinctes mains te cri mercy, Dame que ayes de moy mercy, Et de ceulx qui te serviront, Et de celuy qui cest dist cy A fait, et de moy qui sui cy, Et de tous ceulx qui le diront.