Text
Domine Ihesu Christe, qui septem verba die ultimo vite tue in cruce pendens dixisti, ut semper ilia sacratissima verba in memoria haberem, rogo te per virtutem illorum septem verborum ut michi parcas quicquid peccavi aut commisi de septem peccatis mortalibus vel ex illis procedentibus, scilicet : de superbia, invidia, ira, accidia, avaricia, gula et luxuria. Domine, sicut tu dixisti : Pater, ignosce crucifigentibus me, fac ut amore tui parcam cunctis michi mala facientibus. Et sicut tu dixisti latroni : Hodie, mecum eris in paradiso, fac me ita vivere ut in hora mortis mee dicas michi : Hodie, mecum eris in paradiso. Et sicut dixisti : Mulier, ecce Filius tuus, deinde dixisti discipulo : Ecce mater tua, fac ut matri tue me societ amor verus et caritas vera. Et sicut tu dixisti ; Hely ! Hely ! lamazabathani, quod est interpretatum : Deus meus ! Deus meus ! ut quid me dereliquisti ? fac me dicere in omni tempore tribulacionis et angustie mee : Pater mi, Domine mi, miserere mei peccatoris et adiuva me, et dirige me, rex meus et Deus meus, qui proprio sanguine tuo redemisti me. Et sicut tu dixisti : Sicio, scilicet salutem animarum sanctarum que in limbo inferni fuerunt ante adventum tuum expectantes, fac ut ego semper diligam et faciam te fontem vivum, fontem aque viventis, fontem eterni luminis toto cordis desiderio adamandum. Et sicut dixisti : Pater, in manus tuas commendo spiritum meum, fac ut in obitu meo perfecte et libere possim dicere tibi : In manus tuas, Domine, commendo spiritum meum ; recipe me venientem ad te, quia nunc cons- titui terminum vite mee. Et sicut tu dixisti : Consummatum est, quod significat dolores et labores quos pro nobis miseris suscipere veneras iam finiri, fac ut in egressu anime mee a corpore meo merear audire illam vocem tuam : Veni, amica mea ; veni, dilecta mea, quia iam disposui penurias tuas consummari ; veni ut mecum ascendas cum angelis sanctis meis in regno meo epulari per infinita secu- lorum secula. Amen
ID Annotation
Domine Ihesu Christe, qui septem verba die ultimo vite tue in cruce pendens dixisti, ut semper ilia | Leroquais 31 | | Prayer | h4669