Text
Seigneur Dieu, souverain et maistre de toute seigneurie, éternel et invincible, inmuable et inmortel, ie me présente et prosterne devant vostre face, me recongnois- sant avec mes fautes en milles sortes estre indigne de vostre bonne grâce et ayde, mais me fortifiant ce néanmoins de vostre clémence et miséricordieuse faveur et ayde. Sire inmortel et omnipotent, puisque ciel et terre vous obéissent et que tout ordre céleste et l'universel est gouverné par vous, comme aussi il a esté créé par vous, je me rends à vostre main comme j'ay tousjours délibéré faire et persévérer toute ma vie, et ne veux rien estre que ce qu'il vous plaira seulement comme enseigne David vostre serviteur ; que ie soys en vostre grâce aydé et conforté de vous, que ie ne craindray plus que mes faultes me mettent entre les mains de mes ennemis. Je ne mescongnois point mes fautes ne mon indignité ; je vous crie mercy, mon Dieu, mon père et mon Seigneur, recevez moy pénitent au nom de celuy qu'avez proposé propiciateur par mort et sacrifice pour les plus grans pécheurs du monde ; donnez paix et repos en mon temps à ce peuple sur lequel vous avez permis que ie règne, et commandez que mes fautes ne leur nuisent point ne les leurs à moy. Mon Dieu, nous sommes tous coupables ; usez envers nous de vostre bonté acoustumée. Je vous présente non point un royaulme qui est à vous et qui a esté préservé par vostre puissance jusques à ce jour, mais moy et toute ma famille, vous supliant nous pardonner toutes nos fautes, nous estre père et ne nous chastier comme nos vices le pourroient mériter. Or donc, Seigneur, prestez moy la force et le conseil pour passer ceste journée et toute ma vie en vostre service et obéissance. Amen
Witness (note)
Paris, Bibl. nat., nouv. acq. lat. 82, fol. 86. Déb. du XVIes. Heures de Rome (François Ier).
ID Annotation
Seigneur Dieu, souverain et maistre de toute seigneurie, éternel et invincible, inmuable et inmortel | Leroquais 23 ; Sonet 1898 | | Prayer | h4662