Text
Princesse de hault paraige, glorieuse et bien aymée vierge Marie, mère de nostre Sauveur Ihésucrist, qui dès le commencement du monde et devant fut préesleuee de Dieu le Père omnipotent pour faire l'aliance de nature divine et de nature humaine. Ce fut la plus grande et merveilleuse aliance que jamais on pourroit penser ne qui peust cheoir en l'entendement d'entre nous hommes. Quant il me souvient de ceste élection prérogative que tu euz entre les femmes, il me semble qu'il n'est pas pos- sible que se tu requiers à ton Fils Nostre Seigneur Ihésucrist, qui est le premier président de la court célestielle et à qui Dieu le Père a donné tout office de judica- ture, me octroier ou donner aucune estincelle de sa grâce que ie ne l'acquière et obtienne facilement si mes péchez ne l'empeschent. Je considère que tu es la porte du ciel ; tu as porté en tes flans celuy qui l'a fait et qui en est le roy. Tu es doncques la porte du mistère de nostre rédemption et par laquelle mon oraison doit passer, s'il te plaît, dame. Mes vices et péchés m'ont longtemps reculé et distrait ; par quoy ne me suis osé ingérer de parler ne prier Ihésucrist ton cher Filz, car ce eust esté trop grant hardiesse à moy, veu que i'estoye et suis trop grant pécheur de moy présenter devant luy sans avoir l'aide de toy, dame, pour moy faire ma planche et pour adresser mon oraison envers luy. Je congnois bien que ie ne puis avoir plus grant moyen que de recourir à toy, dame, pour penser ma prière, et, se iay différer à le prier, c'est pour ce qu'il n'y a point de proportion de luy à moy, néant plus que de péché à toute bonté et droiture. Et quelque grandeur qu'il ait, toutefois, dame, tu l'as conceu et contenu en tes flans. Et les philosophes dient, et on le voit à l'œil, que ce qui contient et environne est plus grand que ce qui est contenu et environné, par quoy je puis aucunement dire et avec la raison de philosophie conclure que toy, dame, qui l'as contenu et environné as aucune prérogative de grandeur par-dessus ton Filz qui en ton précieux ventre a esté enclos. Par quoy il me semble que se pour moy le veulx prier, qu'il ne t escondira point. Car il t'a assise en son throsne divin auprès de luy. Laquelle chose nous figura bien le roy Salomon quant il fit asseoir sa mère en son throsne. Dame, tu es plaine de tant de grâces et prérogative que ie me puis bien enhardir prier ton Filz après que d'estre mon advocate auras esté avertie. Je ne scay autres chose dire fors que ie te prie que soye mon intercesseresse envers luy, que me par- donnes mes péchés et qu'il me donne sa grâce et me adresser de faire et dire chose qui puisse profiter à ceulx qui après moy viendront, et mesmement en l'ordonnance de ces présentes heures que iay intention de faire et extraire à la gloire et à la louenge de ton benoist Filz, de toy, dame et de la cour célestielle de paradis. Et en ceste confidence, dame, ie luy voys présenter ma requeste faicte et dictée en ceste manière
Witness (note)
Paris, Bibl. nat., lat. 10561, fol. 99, fin du XVes. Rome.
ID Annotation
Princesse de hault paraige, glorieuse et bien aymée vierge Marie, mère de nostre Sauveur Ihésucrist, | Leroquais 17 ; Sonet 1710 | | Prayer | h4656