Text
Mychiel, prince très glorieux,
Qui es prévos lassus es cielx,
Là te donna Dieu tel poissance
Quar il te donna la balance
Pour trestoutes âmes peser ;
Les bonnes mes pour reposer
En paradis avecques Dieu,
Là tu leur ordonnes leur lieu ;
Mais les meschéans si sont dampnées
En enfer et chétives clamées
A souffrir pardurablement
Paine, meschief et grief tourment
Avec Lucifer l'orguilleux
Contre qui un champ merveilleux
Tu preis et à luy bateillas,
Et puis un tel coup li donnas
Que après ce coup senz faillir
De paradis le feis saillir,
Et en enfer prist sa demeure
Duquel il n'a ne iour ne heure
De bien, de ioye ne de soulas ;
Là puet tousiours cryer hélas.
Or suy je plain de grant meschéance
Car tousiours ma douleur commence.
Pourtant te pry, benois archanges,
Qui es dignes de grans loanges,
Que tu me vueilles resgarder,
Et mon corps et m'âme garder,
Que trois annemis qui m'assaillent
Et contre moy si fort bataillent
N'aient sur moy telle victoire
Dont perde de paradis la gloire ;
Mais contre eulx par ta deffensse,
Aye tousiours vraye puissance,
Et garde ainsi mes amis,
Et amende mes annemis,
Et touz ceulx qui t'apelleront
Et de bon cuer te prieront,
Soyes leur en leurs fais propices,
Et leur empètre bénéfices,
Que contre touz péchiez aient victoire
Et qu'ils aient tousiours mémoire
Et bonne recordation
De la benoîte passion
Que Ihésucrist pour nous souffri
Quant en la croiz pour nous pendi.
Encor te vueil je deprier,
Et de bon cuer toy supplier,
Que quant noz âmes s'en iront
Et du corps se départiront,
Que tu les vueilles recevoir
Affin qu'elles puissent avoir
Joye senz fin et senz partie,
Et avoir pardurable vie,
Laquelle nous vueille donner
Et noz lieux nous vueille ordonner
Ihésus li Filz de Dieu le Père,
Emprès sa glorieuse mère
Witness (note)
Paris, Bibl. nat., lat. 924, fol. 14, Heures à l’usage de Troyes, XVes. (début).
ID Annotation
Mychiel, prince très glorieux, Qui es prévos lassus es cielx, Là te donna Dieu tel poissance Quar il | Leroquais 12 ; Sonet 1140 | | Prayer | h4652