Text
A toy, iuge souverain, Viens confesser ma dolour, Qui pour le lignage humain, Es mort à grant deshonnour ; Bien doy vivre à grant tristour, Car tous tes biens m'as donné, Et riens ne fais ne nuit ne iour Fors contre ta volenté. Dous Ihésus, mon très dous père, Comment te présenteray Ma poure âme en vie amère Ne rien ne te demanderay ? Que feray ne que diray ? Je ne fis oncq ne ne dis Fors mal, hélas ! Où iray ? Ge doy bien estre esbahis. Des très grans maus que ge fais Dis et penses sans mesure M'ont privé de tes biensfais, Et suis mis à tele ordure Qui pour raison et droiture Ie che en dampnacion. Las ! ceste sentence est dure Si elle est sans compassion. Or aige mon temps perdu En cest monde plain de paine, Et que m'ont mes labours valu Es queus nuit et iour me paine, Il n'est ne mois ne semaine, Iour ne hore ne moment, En quoy la mort ne me maine Pour recevoir iugement. Ie n'ay pas une seule heure Depuis que ieu congnoissance En l'essil où ie demeure, Pencé en ma conscience, Et mon Dieu mon espérance Que fera ta créature ? Elle chiet en despérance Si d'elle ne prens la cure. Marie, royne des chieus, Qui enfantas sans dolour, Fay ton Fis vers moy piteus, Que ie confesse ma doleur De ce que par fausse couleur Sui et en péchié lié. Las ! bien doy vivre en doleur Quant ie ay mon Dieu oublié. Aidiés moy, sains et amis Du très grant roy souverain, Si par moy ie me sui mis Et par mon faus cuer vilain Contre mon Dieu et si loing Que ne le puis amender. Las ! ie n'auray de demain Merci te veul demander Et tu, glorieus martir, Lonneur des Frères Prêcheurs, Saint Pierre, fay moy sentir Comme ie sui grant pécheur, Donne moy lermes et pleurs Par ton impétracion, Car ie ai trop pensé aillours Que en vraie dévocion. Vrai Dieu ou iay mon entente, Ie te pri dévotement, Montre moy la droite sente D'aler à mon sauvement, Et m'otroie présentement Toy amer, servir et craindre, Mes péchiés amèrement Souspirer, gémir et plaindre. Si ie fourvoie si madrete, Dous Ihesu en qui ie croy, Et conforte ma feblece Si ie faus, enseigne moy, Et si na en mi pour quoy Ta grâce doie demander, Ie croy fermement de toy Que tu le pues amender, Pour ce en ta miséricorde Ie fais supplicacion, Ma poure âme à toy acorde Par ta sainte passion, Des mors aies compassion, Et aus vis ta grasse otroie, A moy telle dévocion Que en ton saint réaume te voie. Amen
ID Annotation
A toy, iuge souverain, Viens confesser ma dolour, Qui pour le lignage humain, Es mort à grant deshon | Leroquais 1 ; Sonet 20 | | Prayer | h4649