Text
Afferte Domino filii Dei afferte Domino filios arietum. Afferte Domino gloriam et honorem afferte Domino gloriam nomini eius adorate Dominum in atrio sancto eius. Vox Domini super aquas Deus maiestatis intonuit Dominus super aquas multas. Vox Domini in virtute vox Domini in magnificentia. Vox Domini confringentis cedros et confringet Dominus cedros Libani. Et comminuet eos tamquam vitulum Libani et dilectus quemadmodum filius unicornium. Vox Domini intercidentis flammam ignis vox Domini concutientis desertum et commovebit Dominus desertum Cades. Vox Domini preparantis cervos et revelabit condensa et in templo eius omnes dicent gloriam. Dominus diluvium inhabitare facit et sedebit Dominus rex in eternum. Dominus virtutem populo suo dabit Dominus benedicet populo suo in pace.
ID Annotation
Afferte Domino, filii Dei, afferte Domino filios arietum. Afferte Domino gloriam et honorem ; affert | HORAE | Psalm 28 | Psalm | h4586