Text
Maiestati tuae famulantibus, domine, miseratus occurre et, quod possis ad indulgentiam inclinari, affectum te rogandi concede. Mortifica in nobis saecularium desiderium voluntatum et per contritionem cordis sacrificium suscipe laudis, ut miseratione tua haec nobis indulta ieiunia propitiationum tuarum exhibeant dona et iniquitatum nostrarum abstergant facinora atque ita nos per observantiae disciplinam erudias, ut, contra insidias inimici gratia tua validiores effecti, unde per intemperantiam gulae decidimus, illuc per continentiam parsimoniae, te adiuvante, redire possimus.
ID Annotation
Maiestati tuae famulantibus, domine, miseratus occurre et, quod possis ad indulgentiam inclinari, af | Corpus Orationum 3296 | | Oration | h8856