Text
Exspectans exspectavi Dominum et intendit mihi. Et exaudivit preces meas et eduxit me de lacu miserie et de luto fecis. Et statuit super petram pedes meos et direxit gressus meos. Et immisit in os meum canticum novum carmen Deo nostro. Videbunt multi et timebunt et sperabunt in Domino. Beatus vir cuius est nomen Domini spes ipsius et non respexit in vanitates et insanias falsas. Multa fecisti tu Domine Deus meus mirabilia tua et cogitationibus tuis non est qui similis sit tibi. Annuntiavi et locutus sum multiplicati sunt super numerum. Sacrificium et oblationem noluisti aures autem perfecisti mihi. Holocaustum et pro peccato non postulasti tunc dixi ecce venio. In capite libri scriptum est de me ut facerem voluntatem tuam Deus meus volui et legem tuam in medio cordis mei. Annuntiavi iustitiam in ecclesia magna ecce labia mea non prohibebo’ Domine tu scisti. Iustitiam tuam non abscondi in corde meo veritatem tuam et salutare tuum dixi. Non abscondi misericordiam tuam et veritatem tuam a concilio multo. Tu autem Domine ne longe facias miserationes tuas a me misericordia tua et veritas tua semper susceperunt me. Quoniam circumdederunt me mala quorum non est numerus comprehenderunt me iniquitates mee et non potui ut viderem. Multiplicate sunt super capillos capitis mei et cor meum dereliquit me. Complaceat tibi Domine ut eruas me Domine ad adiuvandum me respice. Confundantur et revereantur simul qui querunt animam meam ut auferant eam. Convertantur retrorsum et revereantur qui volunt mihi mala. Ferant confestim confusionem suam qui dicunt mihi euge euge. Exultent et letentur super te omnes querentes te et dicant semper magnificetur Dominus qui diligunt salutare tuum. Ego autem mendicus sum et pauper Dominus sollicitus est mei. Adiutor meus et protector meus tu es Deus meus ne tardaveris.
ID Annotation
Exspectans exspectavi Dominum,et intendit mihi. Et exaudivit preces meas,et eduxit me de lacu miseri | HORAE | Psalm 39 | Psalm | h515
ID Arkindex
abaac0be-f237-4a70-9fd7-ee1686d8f8d7