Text
Beata es, Maria, Virgo dulcis et pia, Candore vincens lilia, Es rosa sine spina, Sanctorum melodia. Virgo Galilaea Nazareth habitavit, Angelus descendens sic eam salutavit, Dicens : Ave, Maria, Virginitatis via ; Beata es, Maria. Virgo es serena, Tota gratia plena, Veniaeque vena Est tua vox amoena Corpusque gratiosum Et totum amorosum, Beata es, Maria. Dominus est tecum, Virgo jam supradicta, Super omnes eris Mater tu benedicta, Et ventris tui fructus Sit semper benedictus ; Beata es, Maria. Angelo respondens Tunc sic ait Maria : Quomodo hoc fiet, Ignoro, quae sit via, Nam virum nunquam novi, Virginitatem vovi Corde et mente pia. Spiritus descendet In te, virgo Maria, Et virtus divina Cum dulci harmonia Cor tuum obumbrabit, Totum mundum salvabit ; Beata es, Maria. Ecce, Dei summi Sum humilis ancilla, Utinam completa Essent promissa illa, Secundum verbum tuum Mittat dilectum suum In virgine Maria.
ID Annotation
Beata es, Maria, Virgo dulcis et pia, Candore vincens lilia, Es rosa sine spina, Sanctorum melodia. | AH 3962 | | Hymn | h141
