Ceste excellente et divine vertu
Qui des humains rend l'Esprit honorable,
Est rare fort, pource qu'elle est durable,
L'Esprit n'en est de tous hommes vestu,
Car maints mortels ne prisent un festu
Ceste vertu saincte et incomparable,
Pource que, pleins de volupté damnable,
Ils n'ont jamais le vice combatu.
Mais vous, ayant la perfaicte notice
Du Toutpuissant, de sa haulte justice,
De ses saincts dons, mérites et biensfaicts,
A un chascun bien donnez cognoissance
Que ne la Mort, ne le temps n’ha puissance
D’ensevelir voz actes tant perfaicts.
