Prince qui m’as chery par dessus mon merite,
Te monstrant desireux d’estre servy de moy,
Il me plaist de descrire une chose de toy,
Qui en prose n’en vers ne fut oncques descrite.
L’immortelle Vertu dans ton Palais habite,
Pour compagnes ayant et l’amour, et la foy,
Le repos, la raison, la justice et la loy,
Qui pour l’or corrompeur ne s’apaise, n’irrite
Sur le maistre portail est eslevé l’honneur
Ayant au costé droict, vestu d’or, le bon heur
Qui porte dans sa main deux cornes d’abondance.
De l’autre flanc on void la liberalité,
Qui t’aquiert ung renom en l’immortalité,
Qui fera pour jamais vivre ton Excellence.
