Estimez vous,
Laurens, qu’un esprit adonné,
Comme je sçay le mien à detester le vice,
Doive tousjours captif, demeurer en service,
Travaillant nuict et jour sans estre guerdonné ?
Si je suis en servant à tort infortuné,
Je ne fais en servant aucun mauvais office,
Et tel ores sur moy exerce sa malice,
Qui en fin, moy absous, en sera condamné.
Jupiter eust jadis pitié de Promethée,
Et quand il eust long tens sa peine supportée
Il fit occire l’aigle et le fit destacher :
Aussi pourront les dieux quelque fois pitié prendre,
Des ennuyz qu’on me donne en cuidant me fascher
Car le mal pour le bien ne se doit jamais rendre.
