Servez bien longuement un seigneur aujourd’huy,
Despendez vostre bien à luy faire service,
Corrompez en servant la vertu pour le vice,
Et soiez attaché nuict et jour pres de luy,
Pour luy donner plaisir donnez vous de l’ennuy,
Sans nul respect à vous servez-le en tout office,
Adonnez vous aux jeux dont il fait exercice,
Et ne demandez rien pour vous ny pour autruy.
Continuez long tens, pour quelque bien acquerre,
A le servir ainsi, puis cassez quelque verre,
Ou faillez d’un seul mot, vous perdez vostre espoir,
Vous perdez vostre tens, vostre bien, vostre peine,
Et ne vous reste rien qu’une promesse vaine,
Et un vain souvenir d’avoir fait le devoir.
