Autre que je ne suis on ne me sauroit faire,
Et si l’ardeur d’amour enflamme mes esprits,
Et si je fais des vers dignes de quelque pris,
C’est irriter les Dieux de dire le contraire :
D’où vient donques,
Pila, qu’un jeune secretaire,
Un orguilleux mignon de la molle Cipris,
Mon amour et mes vers ose mettre à mespris,
Faisant d’un œuvre saint un jugement vulgaire ?
Il est vrai qu’un autheur reçoit bien peu souvent
Son honneur merité, tandis qu’il est vivant,
Et qu’on void la vertu tousjours estre foulée :
Mais un qui trop enflé n’a rien de bon en luy,
Ne trouve voluntiers rien de bon en autruy,
Et fait ses jugements tousjours à la volée.
