Au temps passé, Romains victorieux
(Dont les grands faictz sont au monde espandus)
Non seulement ont esté curieux
De guerroyer, mais tresbien entendus
Aux lettres, dont illustres sont rendus.
Semblable à eulx j’estime ta nature
Car tu as bien cest ardent zele et cure
(Oultre les dons de ta noble proesse)
De t’employer à la littérature,
Qui donne bruict à ta vive noblesse.
