Rendre on ne peult un plaisir suffisant
(
Je l’ose dire) à celuy qui mect peine
Comprendre en soy, par moyen bien duysant,
Histoire, en tout suyvant la bonne veine
Au vray, de ceulx qui par science pleine
Recueilly ont tout ce qu’il en peult estre
Dont clerement nous l’ont faict apparoistre,
Voire si bien que pleine congnoissance
Se montre à nous, chacun le peut congnoistre.
De Vertu, vient à tout homme excellence.
Vray est (lecteur) quand cest oeuvre liras,
Apres avoir en ton faict travaillé,
Sois tout certain que trouver y pourras
Suffisamment, pour estre esmerveillé.
Et si tu as l’esprit bien esveillé,
Bien tu pourras facilement comprendre,
Oultre tout fruict, ce que tu doibs pretendre.
Voulant monter au degré de science.
Revolue bien, tu le pourras apprendre,
Glorieux faict, cause à l’homme excellence.
Prince haultain, qui a sur tout pouvoir
Faicts que chacun face si bon debvoir,
De ce bel oeuvre, avoir intelligence,
Tant qu’à son faict il puisse bien pourveoir.
Glorieux faict cause à l’homme excellence.
