Par le seul trait de voz yeux flamboyans,
Bruslé m'avez jusques à la chair vive,
Entrant le mal par les miens, trop voyans
Ce que contient vostre beauté naïve.
Mais plus j'y pense et plus le feu s'avive,
Plus m'en metz hors, plus ay d'affection.
O quel regard qui donne lesion !
Et quand il veult la guerison parfaite,
Helas, helas ! soyez le Scorpion,
Et guerissez la playe qu'avez faite.
