Venus un jour veit son filz revenir
L’arc en la main, et en son col la trousse.
Si le regarde, et luy va souvenir
Des maulx qu’il fait quant un peu se courrouce.
Lors, d’une voix plus fascheuse que doulce,
Luy dist ainsi : "Enfant plein de courroux,
Ne veux tu point estre aux humains plus doulx
Sans en navrer de playe mortifere ?"
Il respondit : "Ma mere, taisez vous :
Ce que j’en fais, vous le me faites faire."
