ScriptaManent 2026-06-08T20:19:20+02:00 1 47820 Transcription https://heurist.huma-num.fr/heurist/?recID=47820&db=ScriptaManent 2024-12-07 15:34:08 2026-04-07 14:19:55 public Si tu as leu quelcquefoys mes œuvres Francoyses... <persName>Estienne Dolet</persName> au lecteur Françoys. Salut https://books.google.fr/books?id=IqA2TO1DDl8C&pg=PA2 311 <p>Si tu as leu quelcquefoys mes œuvres Francoyses, et mesmement aulcunes epistres, lesquelles j’ay premises à certains livres par moy imprimés, tu ne peulx ignorer mon vouloir estre tel que je ne cherche que les moyens de mettre nostre langue en tel degré qu’on la puisse d’oresnavant aultant estimer (et ce à la verité) que plusieurs aultres non tant riches en eloquence qu’ycelle. Pour parvenir à mon intention, je ne me contente de ce que je puis faire de ma part, mais je repçoy de bien bon cueur les œuvres de plusieurs gens sçavants de nostre siecle et les mects certes en lumiere de non moyndre affection (diray je, plus curieusement ?) que les miennes propres. Comme prochainement j’ay faict de toutes les œuvres de <persName>Marot</persName> (Poëte de facilité et grace tant singuliere que tousjours laisse ung desir de soy) et dernierement <bibl>l’Amye de court</bibl>, faicte par <persName>la Borderie</persName>. Maintenant je t’en produis ung d’une aultre estoffe : c’est-à-dire plus haultain, et de discours plus grave, comme bien congnoistras en le lysant diligemment. Or commence doncq à entendre que nostre langue est en telz termes que desja on ne la peult appeller barbare, mais plus tost esgale aux antiques quant à louange d’eloquence. Et si Dieu permect, et veult par sa grace qu’elle vienne en tel accroissement que le commencement en est, je puis dire que jamais la Grecque, ny la Latine ne furent en telle parfection que l’on voirra en brief estre la Françoyse : de sorte que si rien ne luy default, ce sera argument et matiere competente de soy exercer, et dilater, comme pour ce faire ont heu les Grecz et Rommains ung Senat plein de liberté où tout honneur estoit proposé aux eloquents. Voyla doncq mon intention. Ly maintenant, pour congnoistre l’excellence de cest œuvre.</p> <p>De Lyon ce premier de Juing. 1542.</p> Claire Sicard 8100 1