Prelat sur qui j’ay mis toute mon esperance,
Presterez vous tousjours l’oreille à ce flateur ?
Adjousterez vous foy tousjours à ce menteur
Qui ne vault rien à rien sinon qu’en aparence ?
Cherirez vous tousjours sa brutalle ignorance ?
Soufrirez vous tousjours qu’il soit si detracteur ?
Et qu’il mesdise ainsi de ce bon serviteur,
Qui seul et seur vous sert aux choses d’importance ?
Permettrez vous qu’on die ainsi publiquement,
Que vous monstrez avoir bien peu de jugement
De favorir si fort une si grande beste ?
Orrez vous point un jour comment le monde dit,
Qu’il ne reçoit de vous ny faveur ny credit,
Que pource qu’il conduit voz jeux de la brayette ?