Ce que je t’ay autresfois presenté,
Et qu’autresfois tu receuz de ta grace,
Je viens encor presenter à ta face,
Pour estre encor de ta grace accepté.
S’il y avoit de la temerité,
Veu ta grandeur, et ma qualité basse,
Divin Prelat, excuse mon audace,
Car telle audace excuse a merité.
Jupiter prend la plus petite offrande
D’aussi bon cueur comme il prend la plus grande,
Egallement des peuples et des Rois.
Une œuvre aussi quand elle est bien descritte,
S’elle a ce bien de bien plaire une fois,
Ne peult desplaire estant dix fois reditte.