Tu riz quand je te dis que j’ay tousjours affaire,
Et penses que je n ay qu à trasser des papiers,
Mais oy, je te supply, par combien de sentiers
Il me fault tracasser, puis pense le contraire.
Mon principal estat c’est d’estre secretaire,
Mais on me fait servir de mille autres mestiers,
Dont celuy que je fais le plus mal volontiers
Est cil qui me contrainct d’endurer et me taire.
Aussi je ne sers pas un maistre seulement,
J’en sers deux, voire trois, et fault qu’egalement
Pour leur plaire à trestous, à chacun d’eux je plaise,
Le plus riche d’entre eux m’est chiche de son bien,
Et tous ensemblement me livrent du malaise,
Et bref servant en tout je ne profite en rien.