Je ne vous ose en mes escritz coucher :
Car quand je veux voz louanges toucher,
Tant plus je veux, moins je puis approcher
De vostre grand merite.
Lors que je metz la Prudence en lumiere,
La Chasteté veut marcher la premiere :
Puis la Constance en dousseur coustumiere,
Veut d’avant estre ecritte.
Et quand ma Muse addresse ses apprestz
Pour les reduire ou d’avant ou apres,
Se trouve loing de ce qui est plus pres,
Et au moins de son plus.
Incontinent qu’à dire elle commence,
Envelopee en si pleine semence,
Se refroidit, en sa grand’ vehemence
D’achever le surplus.
Brief, ne povant en grand’ eau nouer,
Ne sauroit mieux voz grand’s valeurs louer
Fors en venant l’impuissance avouer,
Et se tient à son moins.
Mais voz escritz d’une armonie extresme,
Par qui vaincriez Pindare le supresme
Mieux qu’oncq’ Corinne, en seront par vous mesme
La trompette et tesmoins.