Pour estre de trop basse fortune, je n’ay peu par aultre meilleur present, ou plus riche don, vous testifier (mon Seigneur) une certaine bonne affection, amour, reverence, et admiration que j’ay conceüe premierement, pour une seule fois avoir esté en la presence de vostre noble Seigneurie, et avoir congneu en vous par le certain sens de la veüe, et intelligence de la vifve voix parlant de l’abondance du cœur, ce que premierement j’avois ouy, par le tesmoignage de bons et veritables personages. Dont pour satisfaire à mon desir de vous gratifier en quelque chose je vous envoye et presente du fruict de mon labeur, et de l’ouvrage de mon art. Car pource que les nobles Seigneurs gentilz hommes françoys, pour liberal passetemps et exercice honneste se delectent à chasser et prendre les bestes sauvages, et à eulx aussi appartient : pource je presente icy à vostre Seigneurie, maintes pieces de venaison et plusieurs bestes rousses et noires, lesquelles je n’ay prinses mais apprinses, et jà rendues si privées, que point ne s’enfuiront devant votre face, ains se tiendront tresheureuses d’estre courues, discourues et prinses par vous, et au contraire malheureuses de n’estre veues et par vous descouvertes. Il y en ha aussi maintes privées et domesticques, que bien vous recognoistrez, car vous y trouverez vostre chien, vostre cheval, vostre oyseau gentil. Je diray davantage : vous y trouverez vostre famille, vous mesme, et finalement vostre Dieu, et le mien, et le Dieu de tous. Parquoy (mon Seigneur) vous plaise le recepvoir, combien que ce soit peu ou rien, de celuy qui dedans et dehors n’ha sinon peu, ou rien, à Dieu.