Le vieil Colin lieutenant des praries de Pan, dieu des bergers, avec Claudin et Colin ses enfans, et Colet leur grand amy, et tresçavant poete Francois, deliberans suyvant leur institution de faire veux, oblations et prieres à Dieu, ad ce qu’il luy pleust estre garde et protection de Pan leur seigneur absent, et le favoriser du prosperé et desiré retour en ces parcz et bergeries, sont advertiz par Colin de son heureuse venue, pource laissant les pleurs et lamentations, concluent d’eux resjouir et louer à son advenement ses vertus, graces et façon de faire, principalement les quattres vertus, temperance, prudence, justice, et force qu’ilz dient et monstrent florir, et avoir principal lieu en sa personne.
Pour Pan Dieu des Bergers, l’autheur entend Monseigneur le Reverendissime Cardinal de Meudon, lors qu’il estoit absent à Rome ; pour le Parc, prarie et bergerie, ses abbayes et ville de Vezelay ; pourledict seigneur Claudin et Colin, enfans dudict lieutenant et Claude Colet natif de Rumilli en Champaigne qu’il illustre par ses doctes escriptz.